1. И в третий день брак бысть в кане галиейстей: и бе Мати Иисусова ту.
  2. Зван же бысть Иисус и ученицы его на брак.
  3. И недоставшу вину, глаголаша мати Иисусова к нему: вина не имут.
  4. Глагола ей Иисус: что мне и тебе, жено? не у прииде час мой.
  5. Глагола Мати его слугам: еже аще глаголет вам, сотворите.
  6. Беху же ту водоноси каменни шесть, лежаще по очищению иудейску, вместящий по двема или трием мерам.
  7. Глагола им Иисус: наполните водоносы воды. И наполниша их до вера.
  8. И глагола им: почерпите ныне и принесите архитриклинови. И принесоша.
  9. Якоже вкуси архитриклин вина бывшаго от воды, и не ведаше, откуду есть: слуги же ведяху почерпший воду: пригласи жениха архитриклин.
  10. И глагола ему: всяк человек прежде доброе вино полагает, и егда упиются, тогда хуждшее: ты соблюл еси доброе вино доселе.
  11. Се сотвори начаток знамением Иисус в кане галилейстей и яви славу свою: и вероваша в него ученицы его.
  12. По сем сниде в капернаум сам и Мати его, и братия его: и ту не многи дни пребыша.
  13. И близ бе пасха иудейска, и взыде во иерусалим Иисус
  14. и обрете в церкви продающая овцы и волы и голуби, и пеняжники седящыя.
  15. И сотворив бичь от вервий, вся изгна из церкве, овцы и волы: и торжником разсыпа пенязи и дски опроверже.
  16. и продающым голуби рече: возмите сия отсюду и не творите дому Отца моего дому купленаго.
  17. Помянуша же ученицы его, яко писано есть: жалость дому твоего Сынесть мя.
  18. Отвещаша же иудее и реша ему: кое знамение являеши нам, яко сия твориши.
  19. Отвеща Иисус и рече им: разорите церковь сию, и треми денми воздвигну ю.
  20. Реша же иудее: четыредесять и шестию лет создана бысть церков сия, и ты ли треми денми воздвигнеши ю?
  21. Он же глаголаше о церкви тела своего.
  22. Егда убо воста от мертвых, помянуша ученицы его, яко се глаголаше, и вероваша писаию и словеси, еже рече Иисус.
  23. Егда же бе в иерусалимех в праадник паски, мнози вероваша во имя его, видяще знамения его, яже творяше.
  24. Сам же Иисус не вдаяше себе в веру их, зане сам ведяше вся,
  25. и яко не требоваше, да кто свидетелствует о человецех: сам бо ведяше, что бе в человецех.

Постоянная ссылка на эту страницу bibleonline.ru/bible/csl/43/02/.

Выбор перевода и языка



© Библия Онлайн, 2003-2016