1. по сих бе праздник иудейскии, и взыде Иисус во иерусалим.
  2. Есть же во иерусалимех овчая купель, яже глаголется еврейски вифесда, пять притвор имущи:
  3. в тех слежаше множество болящих, слепых, хромых, сухих, чающих движения воды:
  4. ангел бо господень на всяко лето схождаше в купель и возмущаше воду: и иже первее влазяше по возмущении воды, здрав бываше, яцем же недугом одержимь бываше.
  5. Бе же ту некий человек, тридесять и осмь лет имый в недузе своем.
  6. Сего видев Иисус лежаща, и разумев, яко многа лета уже имяше, глагола ему: хощеши ли цел быти,
  7. Отвеща ему недужный: ей, господи, человека не имам, да, егда возмутится вода, ввержет мя в купель: егда же прихожду аз, ин прежде мене слазит.
  8. глагола ему Иисус. востани, возьми одр твой, и ходи.
  9. и абие здрав бысть человек. и взем одр свой, и хождаше. Бе же суббота в той день.
  10. Глаголаху же жидове исцелевшему. суббота есть, и не достоит ти взяти одра.
  11. Он отвеща им. иже мя сотвори цела, той мне рече: возьми одр твой и ходи.
  12. Вопросиша же его: кто есть человек рекии ти: возьми одр твой и ходи?
  13. Изцелевый же не ведяше, кто есть: Иисус бо уклонися, народу сущу на месте.
  14. потом же обрете его Иисус в церкви, и рече ему: се здрав еси: ктому не согрешай, да не горше ти что будет.
  15. Иде же человек, и поведа иудеом, яко Иисус есть, иже мя сотвори цела.
  16. И сего ради гоняху Иисуса иудее, и искаху его убити, зане сия творяше в субботу.
  17. Иисус же отвещаваше им: Отец мой доселе делает, и аз делаю.
  18. И сего ради паче искаху его иудее убити, яко не токмо разоряше субботу, но и Отца своего глаголаше Бога, равен ся творя Богу.
  19. Отвеща же Иисус и рече им. аминь, аминь глаголю вам, не может Сын творити о себе ничесоже, аще не еже видит Отца творяща: яже бо он творит, сия и Сын такожде творит.
  20. Отец бо любит Сына, и вся показует ему, яже сам творит: и больша сих покажет ему дела, да вы чудитеся.
  21. Якоже бо Отец воскрешает мертвыя и живит, тако и Сын, ихже хощет, живит.
  22. Отец бо не судит никомуже, но суд весь даде Сынови,
  23. да вси чтут Сына, якоже чтут Отца. а иже не чтит Сына, не чтит Отца пославшаго его.
  24. Аминь, аминь глаголю вам, яко слушаяй словесе моего и веруяи пославшему мя имать живот вечныи, и на суд не приидет, но преидет от смерти в живот.
  25. Аминь, аминь глаголю вам, яко грядет час, и ныне есть, егда мертвии услышат глас Сына Божия, и услышавше оживут.
  26. Якоже бо Отец имать живот в себе, тако даде и Сынови живот имети в себе.
  27. и область даде ему и суд творити, яко Сын человечь есть.
  28. Не дивитеся сему: яко грядет час, в оньже вси сущии во гробех услышат глас Сына Божия,
  29. и изыдут сотворшии благая в воскрешение живота, а сотворшии злая в воскрешение суда.
  30. Не могу аз о себе творити ничесоже. Якоже слышу, сужду, и суд мой праведен есть, яко не ищу воли моея, но воли пославшаго мя Отца.
  31. Аще аз свидетельствую о мне, свидетельство мое несть истинно:
  32. ин есть свидетельствуяй о мне, и вем, яко истинно есть свидетельство, еже свидетельствует о мне:
  33. вы посласте ко иоанну, и свидетельствова о истине.
  34. Аз же не от человека свидетельства приемлю, но сия глаголю, да вы спасени будете.
  35. Он бе светильник горя и светя: вы же восхотесте возрадоватися в час светения его.
  36. Аз же имам свидетельство более иоаннова: дела бо, яже даде мне Отц, да совершу я, та дела, яже аз творю, свидетельствуют о мне, яко Отец мя посла.
  37. И пославыи мя Отец сам свидетельствова о мне. Ни гласа его нигдеже слышасте, ни видения его видесте,
  38. и словесе его не имате пребывающа в вас, зане, егоже той посла, сему вы веры не емлете.
  39. испытайте писаний, яко вы мните в них имети живот вечныи. и та суть свидетельствующая о мне.
  40. И не хощете приити ко мне, да живот имате.
  41. Славы от человек не приемлю,
  42. но разумех вы, яко любве Божия не имате в себе.
  43. Аз приидох во имя Отца моего, и не приемлете мене: аще ин приидет во имя свое, того приемлете.
  44. Како вы можете веровати, славу друг от друга приемлюще, и славы, яже от единаго Бога, не ищете?
  45. Не мните, яко аз на вы реку ко Отцу: есть, иже на вы глаголет, моисей, наньже вы уповаете.
  46. Аще бо бысте веровали моисеови, веровали бысте убо и мне: о мне бо той писа.
  47. Аще ли того писанием не веруете, како моим глаголом веру имете?

Постоянная ссылка на эту страницу bibleonline.ru/bible/csl/43/05/.

Выбор перевода и языка



© Библия Онлайн, 2003-2016