1. смеет ли кто от вас, вещь имея ко иному, судитися от неправедных, а не от святых,
  2. не весте ли, яко стии мирови имут судити, и аще вами суд приимет мир, недостоини есте судищем худым,
  3. не весте ли, яко аггелов судити имамы, а не точию житеиских,
  4. житеиская бо судища аще имате, уничиженных в церкви, сих посаждаете.
  5. к сраму вам глаголю. тако ли несть в вас мудр ни един, иже может разсудити между братии своих,
  6. но брат с братом судится, и то пред неверными.
  7. уже убо отнюд вам срам есть, яко тяжбы имате между собою. почто не паче обидими есте, почто не паче лишени бываете,
  8. но вы сами обидите и лишаете, да еще братию.
  9. или не весте, яко неправедницы царствия Божия не наследят, не льстите себе. ни блудницы, ни идолослужители, ни прелюбодеи, ни сквернители, ни малакии, ни мужеложницы,
  10. ни лихоимцы, ни татие, ни пияницы, ни досадители, ни хищницы царствия Божия не наследят.
  11. и сими убо нецыи бесте. но омыстеся, но освятистеся, но оправдистеся именем Господа нашего Иисуса Христа и духом Бога нашего.
  12. вся ми леть суть, но не вся на пользу. вся ми леть суть, но не аз обладан буду от чего.
  13. брашна чреву, и чрево брашном. Бог же и сие и сия упразднит. тело же не блужению, но гви, и Господь телу.
  14. Бог же и Господа воздвиже, и нас воздвигнет силою своею.
  15. не весте ли, яко телеса ваша удове Христовы суть, вземь ли убо уды Христовы, сотворю уды блудничи, да не будет.
  16. или не весте, яко прилепляяися сквернодеице едино тело есть с блудодеицею, будета бо, рече, оба в плоть едину.
  17. прилепляяися же Господеви един дух есть с Господем.
  18. бегаите блудодеяния. всяк бо грех, егоже аще сотворит человек, кроме тела есть. а блудяи, во свое тело согрешает.
  19. или не весте, яко телеса ваша храм живущаго в вас стаго духа суть, егоже имате от Бога, и несте свои,
  20. куплени бо есте ценою. прославите убо Бога в телесех ваших и в душах ваших, яже суть Божия.

Постоянная ссылка на эту страницу bibleonline.ru/bible/csl/53/06/.

Выбор перевода и языка



© Библия Онлайн, 2003-2016