1. подражатели мне бываите, якоже и аз Христу.
  2. хвалю же вы, братие, яко вся моя помните, и якоже предах вам, предания держите.
  3. хощу же вас ведети, яко всякому мужу глава Христос есть. глава же жене, муж. глава же Христу, Бог.
  4. всяк муж, молитву дея или пророчествуяи покрытою главою, срамляет главу свою.
  5. и всяка жена, молитву деющая или пророчествующая откровенною главою, срамляет главу свою. едино бо есть и тожде остриженнеи.
  6. аще бо не покрывается жена, да стрижется. аще ли же срам жене стрищися или бритися, да покрывается.
  7. муж убо не должен есть покрывати главу, образ и слава Божия сыи. жена же слава мужу есть.
  8. несть бо муж от жены, но жена от мужа.
  9. ибо не создан бысть муж жены ради, но жена мужа ради.
  10. сего ради должна есть жена власть имети на главе аггл ради.
  11. обаче ни муж без жены, ни жена без мужа, о Господе.
  12. якоже бо жена от мужа, сице и муж женою. вся же от Бога.
  13. в вас самех судите, лепо ли есть жене откровеннеи Богу молитися,
  14. или и не самое естество учит вы, яко муж убо аще власы растит, безчестие ему есть,
  15. жена же аще власы растит, слава еи есть, зане растение власов вместо одеяния дано бысть еи.
  16. аще ли кто мнится спорлив быти, мы таковаго обычая не имамы, ниже церкви Божия.
  17. сие же завещавая не хвалю, яко не на лучшее, но на хуждшее сбираетеся.
  18. первое убо, сходящымся вам в церковь, слышу в вас распри сущыя, и часть некую сих верую.
  19. подобает бо и ересем в вас быти, да искуснии явлени бывают в вас.
  20. сходящымся убо вам вкупе, несть Господскую вечерю ясти.
  21. кииждо бо свою вечерю предваряет в снедение, и ов убо алчет, ов же упивается.
  22. еда бо домов не имате, во еже ясти и пити, или о церкви Божиеи нерадите, и срамляете не имущыя, что вам реку, похвалю ли вы о сем, не похвалю.
  23. аз бо приях от Господа, еже и предах вам, яко Господь Иисус в нощь, в нюже предан бываше, прием хлеб,
  24. и благодарив преломи, и рече. приимите, ядите. сие есть тело мое, еже за вы ломимое. сие творите в мое воспоминание.
  25. такожде и чашу по вечери, глаголя. сия чаша новыи завет есть в моеи крови. сие творите, елижды аще пиете, в мое воспоминание.
  26. елижды бо аще ясте хлеб сеи и чашу сию пиете, смерть Господню возвещаете, дондеже приидет.
  27. темже иже аще яст хлеб сеи или пиет чашу Господню недостоине, повинен будет телу и крови Господни.
  28. да искушает же человек себе, и тако от хлеба да яст и от чаши да пиет.
  29. ядыи бо и пияи недостоине, суд себе яст и пиет, не разсуждая тела Господня.
  30. сего ради в вас мнози немощни и недужливи, и спят довольни.
  31. аще бо быхом себе разсуждали, не быхом осуждени были.
  32. судими же, от Господа наказуемся, да не с миром осудимся.
  33. темже, братие моя, сходящеся ясти, друг друга ждите.
  34. аще ли кто алчет, в дому да яст, да не в грех сходитеся. о прочих же, егда прииду, устрою.

Постоянная ссылка на эту страницу bibleonline.ru/bible/csl/53/11/.

Выбор перевода и языка



© Библия Онлайн, 2003-2016