1. сказую же вам, братие, благовествование, еже благовестих вам, еже и приясте, в немже и стоите,
  2. имже и спасаетеся, кацем словом благовестих вам, аще содержите. разве аще не всуе веровасте.
  3. предах бо вам исперва, еже и приях, яко Христос умре грех наших ради, по писанием.
  4. и яко погребен бысть, и яко воста в третии день, по писанием.
  5. и яко явися кифе, таже единонадесятим.
  6. потом же явися боле пяти сот братиям единою, от нихже множаишии пребывают доселе, нецыи же и почиша.
  7. потом же явися иакову, таже аплом всем.
  8. последи же всех, яко некоему извергу, явися и мне.
  9. аз бо есмь мнии аплов, иже несмь достоин нарещися апл, зане гоних церковь Божию.
  10. благодатию же Божиею есмь, еже есмь. и благодать его, яже во мне, не тща бысть, но паче всех их потрудихся. не аз же, но благодать Божия, яже со мною.
  11. аще убо аз, аще ли они, тако проповедуем, и тако веровасте.
  12. аще же Христос проповедуется, яко из мертвых воста, како глаголют нецыи в вас, яко воскресения мертвых несть,
  13. и аще воскресения мертвых несть, то ни Христос воста.
  14. аще же Христос не воста, тще убо проповедание наше, тща же и вера ваша.
  15. обретаемся же и лжесвидетеле Божии, яко послушествовахом на Бога, яко воскреси Христа, егоже не воскреси, аще убо мертвии не востают.
  16. аще бо мертвии не востают, то ни Христос воста.
  17. аще же Христос не воста, суетна вера ваша. еще есте во гресех ваших.
  18. убо и умершии о Христе, погибоша.
  19. и аще в животе сем точию уповающе есмы во Христа, окаяннеиши всех человек есмы.
  20. ныне же Христос воста от мертвых, начаток умершым бысть.
  21. понеже бо человеком смерть бысть, и человеком воскресение мертвых.
  22. якоже бо о адаме вси умирают, такожде и о Христе вси оживут.
  23. кииждо же во своем чину. начаток Христос, потом же Христу веровавшии, в пришествии его.
  24. таже кончина, егда предаст царство Богу и Отцу, егда испразднит всяко начальство и всяку власть и силу.
  25. подобает бо ему царствовати, дондеже положит вся враги под ногама своима.
  26. последнии же враг испразднится смерть.
  27. вся бо покори под нозе его. внегда же рещи, яко вся покорена суть ему, яве, яко разве покоршаго ему вся.
  28. егда же покорит ему всяческая, тогда и сам Сын покорится покоршему ему всяческая, да будет Бог всяческая во всех.
  29. понеже что сотворят крестящиися мертвых ради, аще отнюд мертвии не востают, что и крещаются мертвых ради,
  30. почто же и мы беды приемлем на всяк час,
  31. по вся дни умираю. тако ми ваша похвала, братие, юже имам о Христе Иисусе Господе нашем.
  32. аще бо по человеку со зверем боряхся в ефесе, кая ми польза, аще мертвии не востают, да ямы и пием, утре бо умрем.
  33. не льститеся. тлят обычаи благи беседы злы.
  34. истрезвитеся праведно и не согрешаите. неведение бо Божие нецыи имут, к сраму вам глаголю.
  35. но речет некто. како востанут мертвии, коим же телом приидут,
  36. безумне, ты еже сееши, не оживет, аще не умрет.
  37. и еже сееши, не тело будущее сееши, но голо зерно, аще случится, пшеницы или иного от прочих.
  38. Бог же дает ему тело, якоже восхощет, и коемуждо семени свое тело.
  39. не всяка плоть таже плоть. но ина убо плоть человеком, ина же плоть скотом, ина же рыбам, ина же птицам.
  40. и телеса небесная, и телеса земная. но ина убо небесным слава, и ина земным.
  41. ина слава солнцу, и ина слава луне, и ина слава звездам. звезда бо от звезды разнствует во славе.
  42. такожде и воскресение мертвых. сеется в тление, востает в нетлении.
  43. сеется не в честь, востает в славе. сеется в немощи, востает в силе.
  44. сеется тело душевное, востает тело духовное. есть тело душевное, и есть тело духовное.
  45. тако и писано есть. бысть первыи человек адам в душу живу, последнии адам в дух животворящь.
  46. но не прежде духовное, но душевное, потом же духовное.
  47. первыи человек от земли, перстен. вторыи человек Господь с нбсе.
  48. яков перстныи, такови и перстнии. и яков нбныи, тацы же и нбнии.
  49. и якоже облекохомся во образ перстнаго, да облечемся и во образ нбнаго.
  50. сие же глаголю, братие, яко плоть и кровь царствия Божия наследити не могут, ниже тление нетления наследствует.
  51. се таину вам глаголю. вси бо не успнем, вси же изменимся
  52. вскоре, во мгновении ока, в последнеи трубе. вострубит бо, и мертвии востанут нетленни, и мы изменимся.
  53. подобает бо тленному сему облещися в нетление, и мертвенному сему облещися в безсмертие.
  54. егда же тленное сие облечется в нетление и смертное сие облечется в безсмертие, тогда будет слово написанное. пожерта бысть смерть победою.
  55. где ти, смерте, жало, где ти, аде, победа,
  56. жало же смерти, грех. сила же греха, закон.
  57. Богу же благодарение, давшему нам победу Господем нашим Иисус Христом.
  58. темже, братие моя возлюбленная, тверди бываите, непоступни, избыточествующе в деле Господни всегда, ведяще, яко труд ваш несть тощь пред Господем.

Постоянная ссылка на эту страницу bibleonline.ru/bible/csl/53/15/.

Выбор перевода и языка



© Библия Онлайн, 2003-2016