1. Сие же веждь, яко в последния дни настанут времена люта.
  2. Будут бо человецы самолюбцы, сребролюбцы, величави, горди, хулницы, родителем противящиися, неблагодарни, неправедни, нелюбовни,
  3. непримирителни, клеветницы, невоздержницы, некротцы, неблаголюбцы,
  4. предателе, нагли, напыщени, сластолюбцы паче нежели Боголюбцы,
  5. имущии образ благочстия, силы же его отвергшиися. И сих отвращайся.
  6. От сих бо суть поныряющии в домы и пленяющии женишца отягощенныя грехами, водимыя похотьми различными,
  7. всегда учащяся и николиже в разум истины приити могущыя.
  8. Якоже ианний и иамврий противистася моисею, такожде и сии противляются истине, человецы растленни умом неискусни о вере.
  9. Но не преуспеют более: безумие бо их явлено будет всем, якоже и онех бысть.
  10. Ты же последовал еси моему учению, житию, привету, вере, долготерпению, любви, терпению,
  11. изгнанием, страданием, якова ми быша во антиохии, во иконии, в листрех: якова изгнания приях, и от всех мя избавил есть Господь.
  12. И вси же хотящии благочстно жити о Христе Иисусе, гоними будут:
  13. лукавии же человецы и чародее преупеют на горшее, прельщающе и прельщаеми.
  14. Ты же пребывай в нихже научен еси и яже вверена суть тебе, ведый, от кого научился еси:
  15. и яко измлада священная писания умееши, могущая тя умудрити во спсние верою, яже о Христе Иисусе.
  16. Всяко писание Богодухновенно и полезно ко учению, ко обличению, ко исправлению, к наказанию еже в правде,
  17. да совершен будет Божий человек, на всякое дело благое уготован.

Постоянная ссылка на эту страницу bibleonline.ru/bible/csl/62/03/.

Выбор перевода и языка



© Библия Онлайн, 2003-2017