1. Всяк бо первосвященник, от человек приемлемь, за человеки поставляется на службы яже к Богу, да приносит дары же и жертвы о гресех,
  2. спострадати могий невежствующым и заблуждающым, понеже и той немощию обложен есть:
  3. и сего ради должен есть якоже о людех, такожде и о себе приносити за грехи.
  4. И никтоже сам себе приемлет честь, но званный от Бога, якоже и аарон.
  5. Тако и Христос не себе прослави быти первосвященника, но глаголавый к нему: Сын мой еси ты, аз днесь родих тя:
  6. якоже и инде глаголет: ты еси священник во век по чину мелхиседекову.
  7. Иже во днех плоти своея моления же и молитвы к могущему спсти его от смерти с воплем крепким и со слезами принес, и услышан быв от благоговеинства,
  8. аще и Сын бяше, обаче навыче от сих, яже пострада, послушанию,
  9. и совершився бысть всем послушающым его виновен спсния вечнаго,
  10. наречен от Бога первосвященник по чину мелхиседекову.
  11. О немже многое нам слово и неудобь сказаемое глаголати, понеже немощни бысте слухи.
  12. Ибо, должни суще быти учителие лет ради, паки требуете учитися, кая писмена начала словес Божиих: и бысте требующе млека, а не крепкия пищи.
  13. Всяк бо причащаяйся млека неискусен слова правды, младенец бо есть:
  14. совершенных же есть твердая пища, имущих чувствия обучена долгим учением в разсуждение добра же и зла.

Постоянная ссылка на эту страницу bibleonline.ru/bible/csl/65/05/.

Выбор перевода и языка



© Библия Онлайн, 2003-2017