1. И дана ми бысть трость подобна жезлу, глаголя: востани и измери церковь Божию и олтарь, и кланяющыяся в ней:
  2. а двор сущий внутрь церкве изнеси внеуду, ниже измери его, зане дан бысть языком: и град святый поперут четыредесять и два месяцы.
  3. И дам обема свидетелема моима, и прорицати будут дний тысящу двесте и шестьдесят, оболчена во вретище.
  4. Сии суть две маслицы и два свещника пред Богом земли стояща.
  5. И иже им неправду сотворит, огнь исходит из уст их и пояст враги их: и иже восхощет обидети их, сему подобает убиену быти.
  6. И сии имут область затворити небо, да не снидет дождь во дни прорицания их, и область имут на водах, обращати я в кровь и поразити землю всякою язвою, елижды аще восхощут.
  7. И егда скончают свидетелство свое, зверь, иже исходит от бездны, сотворит с ними брань и победит их и убиет я,
  8. и трупы их оставит на стогнах града великаго, иже нарицается духовне содом и египет, идеже и Господь наш распят бысть.
  9. И зрети имут от людий и племен, и от язык и колен, телеса их дни три и пол, и трупы их не оставят положити во гробех.
  10. И живущии на земли возрадуются и возвеселятся о них, и дары послют друг ко другу, яко оба сия пророка мучиста живущыя на земли.
  11. И по триех днех и пол, дух животен внидет в ня от Бога, и станут на ногах своих: и страх велий нападет на зрящих их.
  12. И услышат глас велий с небесе, глаголющ им: взыдита семо. И взыдоста на небо на облацех, и видеша я врази их.
  13. И в час той трус бысть велий, и десятая часть града паде, и погибе трусом имен человеческих седмь тысящ: и прочии пристрашни быша и даша славу Богу небесному.
  14. Горе второе отиде: се, горе третие грядет скоро.
  15. И седмый ангел воструби, и быша гласи велицы на нбсех, глаголюще: бысть царство мира Господа нашего и Христа его, и воцарится во веки веков.
  16. И двадесять и четыри старцы, пред Богом седящии на престолех своих, падоша на лица своя и поклонишася Богу,
  17. глаголюще: хвалим тя, Господи Боже вседержителю, иже сый и бе и грядый, яко приял еси силу твою великую и воцарился еси:
  18. и языцы прогневашася: и прииде гнев твой, и время мертвым суд прияти, и дати мзду рабом твоим пророком и святым и боящымся имене твоего, малым и великим, и растлити посмраждшыя землю.
  19. И отверзеся храм Божии на небеси, и явися кивот завета его в храме его: и быша блистания и гласи, и громи и трус, и град велик.

Постоянная ссылка на эту страницу bibleonline.ru/bible/csl/66/11/.

Выбор перевода и языка



© Библия Онлайн, 2003-2016